Alnæmisbörn

Alnæmisbörn fá styrki frá AuðiCapital

inga — Fri, 03 Sep 2010 11:12:52 +0000

Félagið Alnæmisbörn fékk síðastliðið vor tvo styrki úr sjóðnum AlheimsAuður, samfélagssjóði AuðarCapital. Annars vegar var veittur styrkur að upphæð kr. 500.000 til þess að kosta skólagöngu ungra, bágstaddra stúlkna á vegum Candle Light Foundation, CLF og hins vegar styrkur að upphæð kr. 200.000 til smálánasjóðs CLF. Styrkirnir voru veittir við formlega athöfn í Ásmundasafni þann 19. júní síðastliðinn, sjá nánar á vefslóðinni http://www.mbl.is/mm/frettir/ innlent/2010/06/21/samfelagssjodir_audar_capital_veita_styrki/. Við styrkveitinguna var sagt frá starfi Erlu Halldórsdóttur, stofnanda Candle Light Foundation.

Alnæmisbörn greiða nú fyrir almenna skólagöngu 21 stúlkna en þeim hefur farið fækkandi síðustu ár. Ástæða þess er sú að félagið hefur ekki haft bolmagn til þess að styrkja fleiri stúlkur en þær sem þegar eru í námi vegna lægra gengis íslensku krónunnar. Nú eru um 70 stúlkur sem bíða þess að geta hafið almennt nám og mun styrkur AuðarCapital gefa fáeinum stúlkum af þeim lista kost á því.

Smálánasjóður CLF, sem Alnæmisbörn komu á fót árið 2007, hefur frá upphafi til dagsins í dag veitt 53 stúlkum lán.. Vegna styrkins geta nú fleiri stúlkur bæst í hópinn.

Í framhaldi af styrkveitingunni birtist viðtal við Hildi Gestsdóttur, dóttur Erlu og varaformanns Alnæmisbarna, í Fréttablaðinu 3. júlí 2010. Sjá slóðina http://epaper.visir.is/media/201007030000/pdf_online/1_20.pdf.

Ný stjórn Alnæmisbarna

inga — Tue, 20 Apr 2010 08:49:28 +0000

Stjórn félagsins Alnæmisbörn sem kosin var á aðalfundi félagsins 18. mars 2010 hélt sinn fyrsta stjórnarfund 14. apríl s.l. og skipti með sér verkum. Skipting verka innan stjórnar er óbreytt frá 2009 utan að Hildur Gestsdóttir, varaformaður, mun taka að sér gjaldkerastarfið í stað Ásdísar Ólafsdóttur. Skipan stjórnar Alnæmisbarna árið 2010-2011: Ingibjörg R. Guðlaugsdóttir, formaður, Hildur Gestsdóttir, varaformaður og gjaldkeri, Sigurlaug Hauksdóttir, ritari og meðstjórnendur eru Ásdís Ólafsdóttir, Lárus Valgarðsson, Ragna Karlsdóttir og Sigríður Baldursdóttir. Ásdís mun hafa umsjón með fjáröflun til þess að félagið geti staðið við skuldbindingar sínar vegna skólagöngu stúlkna á vegum Candle Light Foundation og Lárus mun hafa umsjón með heimasíðu Alnæmisbarna.

Sala á brauði og kökum í Kringlunni

inga — Sun, 21 Mar 2010 16:27:12 +0000

Alnæmisbörn stóðu fyrir sölu á brauði og kökum, sem um 20 félagsmenn og velunnarar Alnæmisbarna bökuðu, í Kringlunni laugardaginn 18. mars s.l. Nokkrar körfur, sem þrjár stjórnarkonur tóku með sér heim frá Candle Light Foundation í lok árs 2008, voru einnig á boðstólum. Vel gekk og seldist fyrir kr. 93.000 og er hreinn ágóði um kr. 80.000 þegar kostnaður vegna leigu á aðstöðu og annað er dreginn frá.

Aðalfundur Alnæmisbarna árið 2010

inga — Tue, 09 Mar 2010 11:55:35 +0000

Aðalfundur Alnæmisbarna var haldinn þann 18. mars 2010 í Orkugarði að Grensásveg 9 og var dagskrá hans samkvæmt lögum félagsins. Formaður Alnæmisbarna, Ingibjörg R. Guðlaugsdóttir, setti fundinn og því næst var Hjalti Franzson kosinn fundarstjóri og Halldór Ármannsson fundarritari. Skýrsla stjórnar og reikningar félagsins, sem formaður lagði fram, voru samþykktir af fundargestum. Úr stjórn áttu að ganga Hildur Gestsdóttir, Ragna Karlsdóttir og Sigurlaug S. Hauksdóttir og gáfu þær allar kost á sér til áframhaldandi setu í stjórn. Halldóra Karlsdóttir og María J. Gunnarsdóttir voru kosnar skoðunarmenn reikninga

admin — Tue, 24 Nov 2009 11:36:36 +0000

Alnæmisbörn vilja benda á alþjóðlega 16 daga átakið gegn kynbundnu ofbeldi. Átakið má rekja aftur til ársins 1991 og stendur yfir frá 25. nóvember, alþjóðlegum baráttudegi gegn kynbundnu ofbeldi, til 10. desember, hins alþjóðlega mannréttindadags. Tímasetning átaksins var valin til að tengja á táknrænan hátt kynbundið ofbeldi og mannréttindi og til þess að leggja áherslu á mannréttindabrotin sem felast í slíku ofbeldi. Markmið átaksins er að knýja á um afnám alls kynbundins ofbeldis. Nánari upplýsingar má finna á heimasíðu Mannréttindastofu Íslands, http://www.humanrights.is/servefir/16dagar