Styrkja félagið
Alnæmisfaraldurinn geisar hvergi harðar en í Afríku. Fátækt, skortur á ódýrum lyfjum og bág staða kvenna valda því öðru fremur. Vandinn sem við er að etja kemur okkur öllum við. Félagið Alnæmisbörn hefur undanfarin misseri stutt starfsemi kertagerðarinnar Candle Light Foundation (CLF) í Kampala í Úganda. Frá upphafi hefur aðalmarkmið CLF verið að hjálpa ungum stúlkum sem eiga um sárt að binda vegna alnæmisfaraldursins að hefja nýtt líf. Margar þeirra hafa lent á götunni – í vændi og fíkinefnaneyslu – og því hvergi átt höfði sínu að halla.
Með því að gefa stúlkunum tækifæri til þess að starfa við kertagerð hluta úr degi og svo tækifæri til þess að læra að lesa og skrifa hafa þær getað endurreist líf sitt. Mikilvægur hluti endurhæfingarinnar felst í því að læra að vinna og sjá um sig sjálfar, þ.e. að taka ábyrgð á eigin lífi. En þegar stúlkurnar koma til CLF hafa tengsl þeirra við daglegt líf rofnað vegna lífsins á götunni. Í raun þurfa þær að læra upp á nýtt að sjá um sig sjálfar, ala upp börnin sín og næra þau, þvo þvott, elda mat, þrífa o.þ.h. Með því að starfa við kertagerðina sjá þær afrakstur vinnu sinnar og augljósan tilgang þess að taka líf sitt föstum tökum. Að auki gefst þeim færi á að stunda nám og afla sér starfsréttinda. CLF veitir þeim nauðsynlegt skjól og öryggi svo að þær geti staðið á eigin fótum.
Vilt þú gera gæfumuninn í lífi ungrar stúlku í Úganda?
Hægt er að gerast styrktaraðili Alnæmisbarna. Styrktaraðilar greiða yfirleitt á bilinu 500-2.500 kr. á mánuði í gegnum heimabanka sinn inn á reikning félagsins. Allir styrkir renna óskiptir til að greiða skólagöngu fyrir stúlkurnar í Kampala.
Bankareikningur Alnæmisbarna 1155-15-40733 kt. 560404-3360
Ein leið til að styrkja verkefnið í Kampala er að fylla út stuðningssamkomulag og koma því til stjórnar Alnæmisbarna.
Ef ekki tekst að hlaða niður stuðningssamkomulagi er hægt að hafa samband við Bjarna Reyr, með tölvupósti: bjarni.reyr.kristjansson(hjá)or.is í síma: 516-6987 (OR) eða 552-0436 (Heima).
Alnæmisbörn leita eftir stuðningi þínum við áframhaldandi öflugt starf í Úganda
Kertasjóður
Innan Alnæmisbarna er starfræktur kertahópur. Kertahópurinn býr til svipuð kerti og gerð eru hjá CLF. Kertin eru seld til fjáröflunar fyrir ferðasjóð vegna CLF. Hildur Gestsdóttir heldur utan um sjóðin og er hann óháður rekstri félagsins.
Til að styrkja kertasjóðin eða að greiða fyrir kerti er hægt að leggja inn á reikning:
reikn: 0301-13-700734, kt: 010672-3419