Um félagið
Félagið Alnæmisbörn var stofnað vorið 2004 til að styðja starf Candle Light Foundation í Kampala í Uganda. Sá stuðningur felst fyrst og fremst í því að styrkja skólagöngu CLF stúlkna, en auk þess hefur félagið styrkt aðra þætti starfseminnar. Til dæmis með því að stofna smálánasjóð sem stúlkur sem lokið hafa sínu námi geta sótt í til að hefja atvinnurekstur og með því að styrkja kaup á landi þar sem vonast er til að CLF geti í framtíðinni byggt sitt eigið húsnæði
Tilgangur og markmið CLF
Candle Light Foundation var stofnað árið 2001 af Erlu Halldórsdóttur. Tilgangur þess er að styðja við ungar stúlkur sem eiga um sárt að binda vegna alnæmis. Starfsemi CLF er þríþætt:
1. Að þjálfa ungar stúlkur í handiðn, saumaskap, hárgreiðslu, kertagerð, sápugerð, tölvunotkun og bakstri.
2. Að veita ungum stúlkum, sem hafa verið í þjálfun, lán til stofnunar atvinnureksturs.
3. Að styrkja ungar stúlkur til skólagöngu í grunn- og framhaldsskóla og verkmenntaskóla.
Árið 2010 valdi Mennta- og íþróttamálaráðuneyti Úganda CLF til þess að taka þátt í óformlegu þjálfunarverkefni á vegum ráðuneytisins. CLF er eitt af fáum frjálsum félagasamtökum (NGO) sem var valið til þátttöku en samtökin voru valin eftir ferli þar sem fleiri frjáls félagssamtök voru rýnd ásamt tækni- og verkmenntastofnunum og háskólum í Úganda.
Candle Light Foundation er með þessu skuldbundin til þess að þjálfa 80 bágstaddar stúlkur, 20 í fatasaumi, 20 í kertagerð, 20 í hárgreiðslu og 20 í bakstri. Þjálfunin stendur yfir árlega í þrjá mánuði í senn og nær til nokkurra ára og fær CLF fjármagn frá ráðuneytinu til að sinna þessari þjálfun. Að henni lokinni fá stúlkurnar skírteini sem er útgefið af Mennta- og íþróttamálaráðuneyti Úganda og viðurkennt í allri Austur-Afríku. Stúlkurnar sem taka þátt í þjálfuninni, eiga einnig möguleika á að bæta við sig og fá diploma og eða hefja formlegt nám.
Stjórn Alnæmisbarna 2011-2012
Sigríður Baldursdóttir, formaður
Hildur Gestsdóttir, varaformaður & gjaldkeri
Sigurlaug Hauksdóttir, ritari
Dögg Guðmundsdóttir
Harpa Hauksdóttir
Margrét Skúladóttir
Ragna Karlsdóttir